CDO-Banner

50 ka awardees sa Piso-Piso program gihatagan og certificate of award

award

 

DAKO ang kalipay sa 50 ka mga awardees sa Piso-Piso program human nakadawat sa ilang Certificate of Award gikan sa siyudad isip aktuwal ug lihitimo nga awardee sa yuta nga ilang gi-okupar sa Cagayan de Oro Resettlement Socialized Housing Project 4 (CDORSHP 4) Barangay Balubal kaganihang buntag Marso 16, 2016.

Gibutyag ni Estate Management Division Officer-in-Charge Floresa Sabuga-a nga kadaghanan sa mga awardees sobra na sa napulo ka tuig nagpuyo sa maong luna ubos sa Piso-Piso program apan wala pa nahatagan og Certificate of Award.

“Napasagdan sila sa dugay nga panahon unya bag-o lang pud nakita sa EMD nga wala pa diay na-award sa ila ang yuta,” dugang ni Sabuga-a.

Si Mayor Oscar Moreno uban sa Chairman sa Task Force for the Emancipation of Piso-Piso Beneficiaries Atty. Edgar Cabanlas, Engr. Ermin Pimentel sa Shelter and Housing Development Multi-Sectoral Task Force ug EMD ang nangulo pagtunol sa Certificate of Award.

Gipahalipayan sa mayor ang mga awardees ilabina nga usa ang Certificate of Award sa mga rekisitos alang sa pagpatitulo sa yuta nga iya sa gobiyerno.

“I will be the first to tell you nga dili pa na mao, kay akong gusto itunol ang titulo gyud,” matod ni Mayor Moreno.

Siya nidugang nga kung maangkon na sa mga awardees ang titulo sa yuta dili na sila mahilabtan bisan kinsa pa ang molingkod nga mayor.