CDO-Banner

Seguridad sa Semana Santa 2016 gipangandaman

ARON maseguro nga luwas ang katawhan ilabina ang liboan ka Katoliko sa Cagayan de Oro ug Misamis Oriental atol sa paghandum sa Semana Santa, hugtanon nga gipangandaman sa lokal nga kagamhanan ang seguridad sa syudad pinaagi sa pag-activate sa Incident Management Team (IMT) sa City Disaster Risk Reduction and Management Council (CDRRMC) sugod karong adlawa hangtud Marso 27 ning tuiga.

Usa ka kamandoan ang gipirmahan ni Mayor Oscar Moreno diin lakip sa nag-unang tahas sa IMT ang pagdumala ug pag-organisa sa tanang responders nga motubag sa panginahanglanon sa mga deboto sa mga lugar sama sa Malasag ug Guadalupe.

Matud ni Allan Porcadilla, officer in charge sa CDRRMO, nga andam na usab ang mga sakop sa Emergency Medical Specialists (EMS) ug Urban Search and Rescue (USAR) group sa mga lugar nga sagad magdasok ang katawhan.

Andam usab ang mga ambulansiya ug hospitals sa mga nagkinahanglan og serbisyo’ng medical ilabina kadtong nag-edad 50 pataas ug 10 anyos paubos ug mga adunay balatian sa possible nga emerhensiya sama sa heat stroke tungod sa nasinati’ng kainit nga epekto sa El Nino.