CDO-Banner

CDO team mihakot og medalya sa Paralympic Games

MIHAKOT og 12 ka medalya ang Team Cagayan de Oro City sa bag-ohay natapos nga 5th National Paralympic Games nga gipasiugdahan sa Philippine Sports Association for the Differently Abled kon PHILSPADA ug Philippine Sports Commission didto sa kaulohan.

Ang mga medalista gi-presentar ni Melagros Maquiling, Head sa Persons with Disability Affairs Office (PDAO) atol sa pagpakayab sa nasudnong bandila sa City Hall, Lunes sa buntag.

Si Niel Christian Tingcay, usa ka bungol, ang nahimong multi-awarded player sa Team CdeO human nakaangkon og upat ka gold medal sa 100m run, 150m run, 200m run ug 400m run sa track and field competitions.

Usa ka gold ug usa ka silver medal ang naangkon usab sa swimmer nga si Daisyber Baynosa. Ang laing tulo ka silver medal nakuha ni Ronald Jaraula sa swimming, Alfred Canedo sa badminton, Simplico Santiago sa table tennis- doubles.

Ang tulo ka bronze medals naangkon ni Noberto Bigcas sa shot put ug Simplico Santiago sa table tennis-singles ug table tennis-mixed. Samtang napakyas ang Team CdeO Wheelchair Basketball Team paghakot og medalya human nahimong fourth placer sa maong kompetisyon.

Subay niini, nagpasalamat og dako si Maquiling sa suporta sa administrasyon ni Mayor Moreno aron magmabungahon ang ilang pagsalmot sa maong national competition.