CDO-Banner

Water sampling sa sanitary landfill pasado sa standards

MAPASIGARBOHON ang Solid Waste Management Division sa City Local Environment and Natural Resources Office (Clenro) ubos sa lokal  nga kagamhanan ning syudad sa makanunayong pagsunod sa kalagdaan sa Environmental Management Bureau sa Department of Environment and Natural Resources (EMB-DENR 10) diha sa pagpadagan sa engineered sanitary landfill sa Sitio Burakan, Brgy Pagalungan ning syudad.

Base sa monitoring sa water quality niadtong Septiyembre 27, 2017 gamit ang mga mosunod pH, temperature, biochemical oxygen demand (BOD), dissolved oxygen (DO).

Ug base sa maong pagtuon, nasutang nahasubay sa standard level ang maong mga water sampling ilabina ang discharge niini sa mga kasapaan ug sa Iponan River base sa gilagda sa EMB-DENR.

Alang sa standard acidity/temperature sa tubig base sa Environmental Impact Statement (EIS) nga 6.0-9.0 @25-32 degrees Celsius, ang water sampling sa discharge sa creek ug Iponan river anaa sa 6.5 @28.6 degrees Celsius samtang ang BOD anaa sa 10mg/L base sa 15mg/L nga standard ug 3.2mg/L nga DO base sa 2 mg/L nga DO.

Ang BOD ug DO maoy basehan sa habitat ug pagkinabuhi sa mga kaisdaan ug bisan unsang matang nga nabuhi sa tubig diha sa kasapaan ug Iponan river.

Tungod niini, mapasigarbohon ang administrasyon ni Mayor Oscar Moreno pinaagi sa Clenro sa pagsunod sa kalagdaan sa EMB – DENR 10 human gitugotan pinaagi sa issuance niini sa Environmental Compliance Certificate (ECC) human sa gipahigayong Site Suitability Assessment niadtong Oktubre 2016.

Kahinumdoman nga una nang gisiradoan ang kanhi open dumpsite sa Upper Dagong, Brgy Carmen niadtong Abril lamang ning tuiga nga sa dugay nang katuigan wala gayud maatiman bisan pa man sa mga kalapasan na niini sa Republic Act 9003 o Ecological Solid Waste Management Act of 2000.