CDO-Banner

Kapolisan gi-orient kalabot border control vs ASF

User Rating: 0 / 5

Star inactiveStar inactiveStar inactiveStar inactiveStar inactive
 

By Annabelle Ricalde / photo by Reynan Baylin

ARON adunay igong kapasidad diha sa ilang pagpahigayon og checkpoint sa mga borders sa syudad aron mabantayan nga dili makasulod sa syudad ang African Swine Fever (ASF), mipailawom sa usa ka orientation kabahin sa border control measures batok ASF ang mga sakop sa City Mobile Force Company (CMFC) sa Cagayan de Oro City Police Office (Cocpo) Martes, Pebrero 11.

Ang kalihokan gipasiugdahan sa Anti-ASF Task Force pinaagi sa mga personahi sa National Veterinary Quarantine Service (NVQS) diin pipila sa mga butang nga gihisgutan mao ang pagpatuman sa rules and regulations diha sa mga border checkpoints.

Lakip na niini ang pagpangita og shipping permit sa mga produktong baboy o buhi nga baboy nga kargamento sa bisan kinsa nga mosulod sa syudad, ingon man ang matang sa mga sakyanan ug trak nga angay gayud susihon kon mosulod sa syudad.

Nunot niini, gihangyo ni City Veterinarian Dr. Lucien Anthony Acac, nangulo sa Anti-ASF Task Force, ang kapulisan nga tabangan ug magtinabangay sila aron masiguro nga dili makasulod ang ASF sa syudad tungod kay maapektuhan dili lang ang ekonomiya apan lakip na ang panginabuhi sa katawhan ug mga gagmay’ng negosyante.

Gitumbok usab ni Dr. Acac ang pito ka mga borders sa syudad og kini mao ang Bugo-Casinglot; Upper Puerto; Indahag; crossing Lumbia; Balubal; crossing Langag (Dansolihon-Tignapoloan boundary); ug Barangay San Simon.

Pipila lamang kini sa mga lakang nga gihimo sa syudad pinaagi sa Anti-ASF Task Force nunot sa pagsulod sa ASF dinhi sa pulo sa Mindanao partikular na sa Davao Occidental nga miabot na usab sa dapit sa Calinan, Malita ug Koronadal diin liboan na ka mga baboy ang nangamatay ug gipangpatay.asf_2.jpgasf.jpgasf_1.jpg

Recent News