CDO-Banner

P1 Plastic Bag Fee Kolektahon na sa City Treasurer's Office

HINGPIT nang ipatuman sa City Treasurer's Office ang usa ka balaodnon sa syudad nga nag-regulate sa paggamit og plastic bag o cellophane, ug nagmando sa mga retail establishments nga mag-kolekta og P1 kada plastic bag gikan sa kustomer.

Kini ang gibutyag ni City Treasurer Dr. Glenn C. Bañez human wala mahingpit ang implementasyon sa City Ordinance No. 12240-2012 sukad kini napalabang sa konseho niadtong tuig 2012.

Apan agig pag-sanong sa hangyo sa ubang negosyante nga wala pa masayod sa maong ordinansa, gipasabot ni Dr. Bafez nga hinay-hinay kon 'gradual' ang pag-kolekta sa dakbayan sa 'P1 plastic carryout bag fee' gikan sa mga retail establishments sama sa dagkong malls, department stores, superstores ug uban pa.
Hinoon, gipahimangnoan sa City Treasurer nga ihingpit na ang pag-kolekta sa 'P1 plastic carryout bag fee' inig labay sa duha ngadto tulo ka bulan nga masubsob nga information drive sa buhatan.

Subay sa maong ordinansa, gimandoan ang matag tindahan nga mo-remit sa City Hall sulod sa unang napulo ka adlaw sa ting-trabaho kon 10 working days matag bulan.

Gitataw usab ni Bañez nga padalhan og final demand letter ang mga establisemento nga dili maka-remit sa City Hall, ug idugang sa ilang tax bill ang bayronon sa plastic bag fee, kon ugaling magmakuli pa gihapon.

Mapugos usab ang buhatan sa City Treasurer pag-revoke o pag-kansela sa ilang business permit tungod kay matud pa ni Dr. Bañez ang non-remittance sa P1 plastic carryout bag fee usa ka sumbanan sa kalapasan sa nahisgutang ordinansa.

Tumong sa balaodnon nga maaghat ang mga konsumidor paggamit og recyclable bags (eco bags) aron mamenosan ang paggamit sa plastic bag nga nakahatag og kadaot sa kinaiyahan tungod kay dili kini madugta (hard-to-recycle).

Ang balaodnon gipangamahanan ni Kagawad President Elipe, kinsa maoy kanhi Chairman sa Committee on Environment and Natural Resources diha sa konseho niadtong 2012.


Source : City Information Office - Ian A. Fuentes