CDO-Banner

FIESTA BUILD 2014 YEAR 2

WALA nakabalda ang kalapok sa Pagatpat Habitat relocation site sa mga volunteers nga misalmot sa Fiesta Build 2014 Year 2 niadtong adlaw’ng Sabado, Agosto 16 nga gipasiugdahan sa Habitat for Humanity uban sa Shelter and Housing Multi-Sectoral Task Force.

Ang mga volunteers naglangkob sa mga estudyante gikan sa nagkadaiyang tunghaan ning siyudad, Armed Forces of the Philippines (AFP); Cagayan de Oro City Police Office (Cocpo), City Government ug ubang ahensiya sa gobyerno ingon man pribadong sektor ug ang Archdiocese of Cagayan de Oro.

Gipasabot ni Jan Awitan sa Habitat for Humanity nga 60 ka unit sa balay ang ilang gihawiran diha sa Pagatpat relocation site.

Atol sa mubong programa, gipasalamatan ni Mayor Oscar Moreno ang mga estudyante, Archdiocese, mga donor agencies ug nagkadaiyang mga ahensiya nga nisuporta sa maong kalihokan.

Si Mayor Moreno nanghinaut nga dili unta bation og kakapoy ang mga hintungdan sa ilang pagtabang sa mga programa sa kagamhanan ning siyudad hilabina sa relocation program.

Nagpasalamat usab si Pagatpat Barangay Chairman Achilles Jude Babaran kang Mayor Oscar Moreno ug sa Habitat for Humanity sa mga proyekto nga gibubo sa iyang barangay.


Source : Facebook - Cagayan de Oro City Info Network