CDO-Banner

`Usa lang ang chief of police’—Moreno

"Col. Olaguera is the only chief of police, no shadow, no de facto.”

Kini ang pamahayag ni Mayor Oscar Moreno atol sa turn-over of command sa bag-ong hepe sa Cagayan de Oro City Police Office (Cocpo) niadtong adlawng Huwebes Septiyembre 25.

Si P/SSupt. Faro Antonio Olaguera ang mihulip ni P/SSupt. Graciano Mijares isip hepe sa Cocpo human milapas na ang gitawag nga tour of duty.

Gawas sa pag-welcome kang Olaguera, gihangyo usab ni Mayor Moreno ang bag-ong hepe nga dili mag-apil-apil sa politika.

“Police work should not be mixed with politics,” dugang sa mayor.

Dungan sa iyang pagdayeg sa maayong performance ni Mijares, nanghinaut si Mayor Moreno nga padayonon ni Olaguera ang nasugdan nga mga programa ni Mijares labina sa kahusay ug kalinaw sa siyudad.

Tungod niini, gipasalamatan ni Mijares si Mayor Moreno sa suporta ug pagsalig nga gihatag kaniya ug sa tibuok hugpong sa kapolisan.

Gipasabot sa mayor nga gihatagan niya og igong katungod ug kagawasan si Regional Police Director Chief Supt. Isagani Genabe nga maoy mopili sa mamahimong hepe sa Cocpo.

Nasayran nga mismong si Mijares ang mirekomendar usab ni Olaguera kang Mayor Moreno hinungdan nga dako ang pagsalig sa mayor nga anaa sa maayong kamot ang dakbayan ug ang katawhan sa Cagayan de Oro

Sa iyang bahin, gipasalig ni Olaguera nga ipatuman ug suportahan niya ang mga programa sa siyudad sama sa Hapsay Dalan ug uban pang mga ordinansa.

Gitunol usab ang tabang pinansiyal ngadto sa tulo ka mga polis nga sila si P/Chief Insp. Alfredo Ortiz, P/Insp. Ramsey Cartagena ug PO3 Anecito Bentuzal nga nasamdan sa pagbuto sa granada atol sa ilang pagdakop sa usa ka suspetsadong drug pusher apan namatay human misukol sa kapolisan ug naunay sa iyang dala nga granada niadtong Septiyembre. 16.


Source : Facebook - Cagayan de Oro City Info Network