CDO-Banner

21 classroom, 3 storey bldg sa PN Roa Sr. elem school gitunol

pnroaschool
SA TINGUHA nga mahatagan og kasayon ug masulbad na ang double-shifting sa mga pampublikong tunghaan tungod sa kakulang sa lawak-saringan, gitunol ni Mayor Oscar Moreno ang 21-classroom, 3-storey building sa sitio Calaanan, Barangay Canitoan ning syudad karong adlawa, Oktubre 1, 2014.

Ang Pedro Oloy Roa Sr. Elementary School kansang mga estudyante misaka na ngadto sa 2,715 gikan sa kapin 1,000 lamang sa nilabay’ng school year usa lamang sa mga public elementary schools ning syudad nga makabaton og dugang mga lawak-saringan pinundohan sa Special Education Fund (SEF) ug aprobado sa Local School Board (LSB).

Tinguha ni Mayor Moreno nga mapalambo ang edukasyon ning syudad diin usa kini nga nalatid sa 8-point agenda sa iyang pangagamhanan.

Ang SEF gikuha gikan sa 1 percent sa real property tax nga nakolekta ning syudad ug gibalik lamang sa Mayor ngadto sa katawhan pinaagi sa paghatag og mga batakang serbisyo.

Matud ni Ma. Dulce Potenciano, focal person on education sa City Hall, nga lakip sa gidapit alang sa turn-over ceremony mao si Kongresman Rolando Uy sa unang distrito ug mga kadagkoan sa Department of Education (DepEd) pinangulohan ni City Schools Division Superintendent Elena Borcillo.

Ang 21-classroom, 3-storey building with covered roof deck magsilbi usab nga multi-purpose hall ug evacuation center panahon nga adunay kalamidad.

Nasayran nga misaka ang populasyon sa maong barangay lakip mga estudyante tungod sa relocation sites nga gipahimutang sa lokal nga kagamhanan ning syudad.

Samtang, una nang gitunol ni Mayor Moreno ang bag-ong 3-classroom Man-ai school building sa Sitio Man-ai sa Brgy. Tignapoloan ug ang 6-classroom Tumpagon National High School sa Brgy. Tumpagon ning syudad.


Source : Facebook - Cagayan de Oro City Info Network