CDO-Banner

GLOBE GCASH MAGAMIT NA KARON PAGBAYAD SA BUHIS UG TRAFFIC CITATION PINAAGI SA ‘MOBILE MONEY SYSTEM’

MAS sayon ug paspas na karon ang pagbayad sa business tax, real property tax, traffic citation ug uban pang buluhisan tungod sa mobile money system nga gipatuman sa City Treasurer’s Office ubos ni City Treasurer Dr. Glenn C. Bańez.

Pinaagi sa pag-dial sa cellphone nga *137# alang sa mga Globe ug TM subscribers, mahimo ng magpakisayod ang mga negosyante, magbubuhis, motorista ug kinabag-ang publiko kalabot sa ilang buhis o’ balayronon sa traffic violation.

Puwede na usab magbayad sa buhis pinaagi sa cellphone kung nakarehistro ang subscriber sa Globe GCash. Sa buot mo-register sa Globe GCash, mahimong modalikyat lang sa pinakaduol nga business center sa Globe o’ kaha dial sa ilang cellphone nga *143# alang sa online registration.

Gawas sa business tax, real property tax ug traffic citation, magamit usab sa Globe/TM subscriber ang ilang GCash account kung magbayad sa sales tax, transfer tax, contractor tax, developers tax ug delivery van tax.

Ang mobile money system usa ka inobasyon sa United States Agency for International Development kon USAID pinaagi sa Scaling Innovations in Mobile Money kon SIMM Project diin recipient ang Cagayan de Oro City. Tumong sa proyekto nga mahatagan og kasayon ug dili na mahasol ang publiko pagbayad sa ilang buhis gamit lang ang cellphone.

Sa ngadto-ngadto, ang mobile money system magamit na usab pagbayad sa bill sa Cagayan de Oro Water District ug CEPALCO, apil loan disbursements ug collections sa First Community Cooperative kon FICCO human mipirma og kasabutan ang maong mga institusyon tali sa USAID.
Subay niini, gibansay bag-ohay lamang sa USAID ang mga frontliners nga kawani sa nagkadaiyang buhatan ug departamento sa City Hall aron ilang masabtan pag-ayo ang konsepto ug proseso sa mobile money system.

Ang kalihukan giabagan sa Cagayan de Oro Trade and Investment Promotions Center nga gipangulohan ni Local Investment Promotions Officer Ms. Eileen San Juan sa Project Invest ug kanhi regional director Nimfa Along-Albania sa DTI Region 10, Promote CDO Foundation ug Oro Chamber.


Source : Facebook - Cagayan de OroCity Info Network