CDO-Banner

Sinakong bugas natunol na sa 72 ka hugpong sa kababayen-an

NATUNOL na ang mga sinakong bugas ngadto sa 72 ka hugpong sa mga kababayen-an ning syudad agig pagpatuman sa Bigasan ng Barangay Project sa Department of Labor and Employment ug administrasyon ni City Mayor Oscar Moreno.

Malipayong gidawat sa matag grupo ang 15 og tunga ka sakong bugas aron magsugod sa negosyong bigasan sa ilang barangay. Gawas sa sinakong bugas, nadawatan usab nila ang timbangan, displayhanan sa panindang bugas ug mga cellophane.

Tungod niini, gipasalamatan sa womens’ group gikan sa Tagpangi ug Lumbia si Mayor Moreno tungod sa kahigayunan nga gitunol kanila nga matabangan sa ilang panginabuhian.

Gipaabot usab ni Kapitan Felipe Baang sa Bayanga ang iyang dakong pasalamat sa administrasyon tungod kay dako kini og ikatabang sa iyang mga ginsakupan sa barangay nga mudako ang ilang kinitaan.

Kahinumduman nga gipunduhan sa DOLE og balor P2.240 milyones ug P960 mil gikan sa syudad aron hingpit nga mapatuman ang proyekto.

Human sa distribution, nagpahigayon usab ang CSWD sa pagpangulo ni CSWD Officer Teddy Sabuga-a og values formation seminar sa 33 ka miyembro sa grupo aron mahibaloan ang pagdumala sa usa ka negosyo. Usa usab ka monitoring ang himoon sa DOLE aron pagsiguro nga mapalambo ang maong proyekto.


Source : Facebook - Cagayan de Oro City Info Network