CDO-Banner

Batakang serbisyo sa syudad apektado sa P2.08B nga 2015 approved budget

DISMAYADO ang mga sakop sa minoriya sa konseho ning syudad sa P2.08 bilyones nga annual budget nga giaprobahan niadtong Lunes sa mga sakop sa majority bloc atol sa ilang session.Kini tungod sa dako kaayong pagkawala sa mga batakang serbisyo nga gipundohan unta sa administrasyon ni Mayor Oscar Moreno alang sa mga proyekto nga na nalatid ug ipatuman sa tuig 2015.

Kahinumdoman nga una nang gisumite sa buhatan sa ehekutibo ang P3.8 bilyones nga budget diin dakong pahat niini ang alang sa social services ug sa serbisyong panglawas sa katawhan ning dakbayan.

Mokabat sa P1.72 bilyones ang nawala sa maong proposed budget ug pipila sa mga apektado niini ang alang sa Philhealth, JR Borja Hospital (JRBH), programa alang sa kabataan ug kababayen-an, aid to indigent, livelihood programs ug pagpanalipod sa kinaiyahan.

Gibutyag ni Konsehal Teodulfo Lao nga sa pagtangtang sa budget alang sa JRBGH lisod na nga makab-ot ang gitinguhang kalamboan diha sa paghatag og serbisyo sa katawhan.

“Lisod na ma-realize ang plano nga ma-upgrade nato ang atong hospital gikan sa status niining primary ngadto sa secondary level,” butyag ni Lao.

Gikasubo usab ni Konsehal Enrico Salcedo,Zaldy Ocon ug Candy Darimbang ang nauyonan sa majority bloc councilors.

Matud ni Salcedo bisan pa man sa ilang paghangyo ug pagpasabot sa dakong epekto sa gi-aprobahang budget apan hingpit gihapon kining gipalabang.

Nasayran nga mas gipaubsan pa ang 2015 annual budget kung itandi sa tuig 2014 nga adunay P2.3 bilyones annual budget.


Source : Facebook - Cagayan de Oro City Unfo Network