CDO-Banner

Open dumpsite sa Brgy Carmen dili na luwas sa panlawas - CHO

GIKABALAK-AN na sa mga sakop sa Solid Waste Management Board (SWMB) kauban ang konseho sa Brgy Carmen ug City Health Office (CHO) ang kasamtangang kondisyon sa open dumpsite nga nahimutang sa Upper Dagong sa maong barangay.

Atol sa pagbisita sa mga sakop sa prensa ug mga sakop sa SWMB lakip ang kadagkoan sa CHO, nasuta nga angayan na gayud pagasirhan ang maong dumpsite tungod sa dako’ng kakuyaw sa panlawas nga resulta niini.

Matud ni Edwin Dael, officer in charge sa City Local Environment and Natural Resources Office (Clenro), taas na kaayo ang level sa gibuga nga infectious gases ug gikahadlokan nga mahitabo na usab ang daghang pag-ulbo sa kalayo sa higayon nga makasinati ang syudad bisan og tulo lamang ka semana nga walay ulan tungod sa kataas sa level sa methane gas niini.

Dugang ni Dael gimandoan na gayud ang syudad sukad pa niadtong 2003 nga angayan na unta kining atimanon ug himoun na untang sanitary landfill apan wala mahatagi og pagtagad sa taas na nga panahon.

Base sa datus sa Clenro ug Island Kids Phils Foundation, ang mga toxic materials sama sa metal plating sa mga daot nga battery, carbon dioxide, carbon monoxide, sulfure oxide mercury, pesticide ug uban pa makadaot sa kidney ug moresulta sa bone marrow diseases ug cancer nga pipila lamang sa mga daghang sakit nga makuha sa mga nanimuyo ug molabay sa maong lugar.

Base usab sa datus sa Carmen Brgy Health Center, walo sa mga bata nga nagtungha sa elementary school sa maong dapit ang positibong nataptan sa sakit nga Tubeculosis (TB) sa gipahigayong screening niadto lamang Enero 20 ning tuiga.

Matud ni Ms. Sol Mosqueda sa City Health Office, 10 ka mga bata nga nag-edad og 0-5 years old ang nasuta’ng malnourished sa maong lugar base usab sa datus sa Carmen Health Center diin irreversible o dili gayud matambalan pa ang epekto niini sa utok sa bata.

Gibutyag usab ni Dr. Fe Bongcas, city health officer ning syudad, dili lamang ang nanimuyo duol sa dumpsite ang apektado niini kondili ang tibuok syudad na gayud.

Dugang ni Bongcas, gikabalak-an sa iyang buhatan nga moabot na sila sa puntong modeklara og health emergency tungod sa taas nga level na sa kakuyaw niini.

Samtang gipasabot usab ni Elvisa Mabelin sa Clenro, nga ang P30 milyones nga gipangayong pundo sa ilang buhatan nga kasamtangang gi-zero sa mayoriya sa konseho alang lamang sa himuong pagtuon kalabot na sa geohazard, citing ug mapping alang sa bag-ong buksan nga sanitary landfill.

Lakip sa mibisita sa dumpsite ang Xavier University, Mangaykayay Association, Island Kids Phils Foundation ug uban pang pribadong sector.

Kahinumdoman nga una nang nagpasar og ordinansa ang syudad niadtong tuig 2011 alang sa pagmugna og laing sanitary landfill sa Sitio Pamalihi sa Brgy Pagatpat apan wala mapadayon tungod sa kakulang sa kinahanglang pagtuon nga miresulta sa wala paghatag og environmental compliance certificate (ECC) sa rehiyonal nga buhatan sa Environmental Management Bureau (EMB).


Source : Facebook - Cagayan de Oro City Info Network