CDO-Banner

14 classroom, 2 storey building sa Fr. William Masterson Elementary School

DAKO ang kalipay sa mga magtutudlo ug ginikanan lakip mga kabataan sa Fr. William Masterson SJ Elementary School sa bag-ong 14-classroom, 2-storey building nga gitunol ni Mayor Oscar Moreno karong adlawa, Marso 3, 2015.

Ang turnover ceremony gisaksihan sa mga kadagkoan sa Department of Education (DepEd), mga sakop sa Local School Board, representante ni Kongresman Rolando Uy sa unang distrito ning syudad ug mga opisyales sa nagkalain-laing departamento sa City Hall.

Ang maong lawak-saringan gipundohan sa Special Education Fund nga gikan sa Real Property Tax nga gibayaran sa buhis sa katawhan ubos sa pagtugot sa mga sakop sa Local School Board.

Samtang dako ang pasalamat ni Sol P. Aceron, school principal sa maong tunghaan, kang Mayor Moreno tungod kay nasinati na gayud nila ang regular scheduling sa matag klase karong tuiga.

Dugang ni Aceron gidayeg usab nila ang mayor tungod sa dako niining gugma sa edukasyon.

Sa mensahe ni Mayor Moreno iyang gidasig ang mga ginikanan ug mga magtutudlo sa pag-amping gayud sa bag-ong lawak-saringan nga magsilbing instrumento sa pagpalambo sa kahibalo sa kabataan nga ilang magamit ugma damlag.

“This will also serve as an immortal reminder to them to be inspired always in their studies,” dugang sa mayor.

Matud sa mayor ang Fr. William Masterson Elementary School nahimutang sa strategic location diin sugdan na sa dili madugay ang bag-ong economic growth area ning syudad.

Gibutyag ni Ms. Mary Jane C. Tolentino, EPP teacher, nga mokabat sa kapin 1,300 ka mga bata ang kasamtangang nagtungha sa Fr. William Masterson nga kanhi nailang KM 5 Elementary School sa Upper Balulang ning syudad.

Ang Fr. William Masterson Elem. School mao usab ang pilot school alang sa Center for Excellence (Centex) program ubos sa Ayala Foundation ug lokal nga kagamhanan ning syudad. (CIO)


Source : Facebook - Cagayan de Oro City Info Network