CDO-Banner

22 classroom Macasandig Nat’l High School gitunol ni Mayor Moreno

ATOL sa pagbukas sa ting-klase karong tuiga, laing bag-ong school campus na usab ang gitunol ni Mayor Oscar Moreno sa katawhan sa Brgy Macasandig adlaw’ng Miyerkules, Hunyo 3 ning tuiga.

Ang bag-ong duha ka gambalay nga 2–storey, 6 classroom building ug 3 storey, 16 classroom with covered roofdeck building nagkantidad og kapin P25.8 milyones ug magsilbing solusyon sa dugay nang kahuot sa mga kabataan nga nagtungha sa sekondarya nga nakigsalo lamang sa Macasandig Elementary School sulod sa taas na nga katuigan.

Matud ni Mayor Moreno ang paningkamot nga masolusyonan ang kakulang sa mga lawak-saringan nakab-ot tungod sa pag-abag sa mga sakop sa Local School Board (LSB) gamit ang pundo sa Special Education Fund.

Tungod niini gipasalamatan sa mayor ang 15-man team sa LSB sa ilang suporta nga miresulta sa pagkamugna sa mokabat sa 309 ka mga lawak-saringan sulod lamang sa kapin 20 ka bulan nga pagpangalagad niini.

Kahinumdoman nga una nang gitunol ang mga bag-ong school campuses sama sa Balulang National High School, Dansolihon National High School, Tuburan National High School, Tumpagon National High School, Agusan National High School, Pagatpat National High School nga sa kadugay nang katuigan nagpabilin nga mga annexes lamang. 

Lakip sa mga gitunol usab ang mga bag-ong elementary public schools sama sa Camaman-an Elem Sch, Pedro Oloy Roa Elem School ug Fr. William Masterson Elem School.


Souce : Facebook - Cagayan de Oro CityInfo Network