CDO-Banner

Kaso sa dengue sa Oro mikunhod og 97%- CHO

MIKUNHOD ang kaso sa sakit nga dengue dinhi sa Cagayan de Oro gikan Enero hangtud Septiyembre ning tuig, sigun pa ni City Health Officer Dr. Fe C. Bongcas.

Kon itandi sa susamang panahon sa miaging tuig, miubos ang kaso sa dengue og 97 porsiyento karong tuiga, taho ni Dr. Bongcas.

Subay sa talaan sa City Health Office, adunay 2,451 ka dengue cases sa miaging tuig ug 12 ka pasyente ang namatay, samtang 1,192 lang ka kaso karong tuiga ug 4 lamang ang namatay.

Mapasalamaton si Dra. Bongcas sa mga opisyales ug katawhan sa barangay nga nakatabang pag-ayo sa pagpakgang sa sakit nga dengue pinaagi sa community clean-up drive.

Masubsob karon ang dengue awareness symposia diha sa pribado ug pampublikong tunghaan sa elementarya, gawas sa ‘larvae survey inspection’ aron pagsuta kon adunay ‘breeding sites’ o’ itloganan sa lamok ang mga eskwelahan.

Gawas pa niini, nag-apud-apud usab og mga flyers ang Public Information and Health Promotion Section sa CHO aron mabasa sa katawhan ang mga paamagi aron makalikay sa dengue, ug usab mailhan kon ang usa ka tawo natakboyan sa maong sakit, ug unsay angay pagabuhaton. (IAF)