CDO-Banner

Online registration sa senior citizens gidayeg

MAS gipasayon karon sa Office of the Senior Citizens Affair kon OSCA sa City Social Welfare and Development Office sa pagpangulo ni CSWD Officer Teddy Sabuga-a ang pagpa-miyembro sa tanang senior citizens ug pag-angkon sa ID human napatuman ang ‘online registration’.

Pinaagi sa Internet, mahimo nang makaparehistro ang usa ka senior citizen aron dili na mahasol pagbisita sa buhatan sa OSCA diha sa City Hall.

Tinguha gayud sa administrasyon ni City Mayor Oscar Moreno nga mahatagan og dakong pagtagad ang mga katigulangan.

Gani man, gidalit sa syudad ang libreng sine matag lunes sa tanang sinehan alang sa mga katigulangan aron makalingaw-lingaw.

Gisaulog usab ang ‘Senior Citizens Week’ diin libreng gitanyag ang eyecare & medical check-up; ug adunay lahi nga ward sa mga senior citizens diha sa JR Borja General Hospital.

Sa kasamtangan, adunay 27 mil ka senior citizens sa syudad ang nakaangkon na sa libreng ID, diin makabenepisyo usab og diskwento sa pampublikong sakyanan, pagpalit og tambal ug daghan pang uban. (GOF)