CDO-Banner

200 ka lawak-saringan itunol sa Marso ning tuig

200 ka lawak-saringan itunol sa Marso ning tuig

AGIG pagsugat sa tuig 2016, gihingusgan ni Mayor Oscar Moreno ang pagpatibawas sa kapin 200 ka mga lawak-saringan ug malaumon kining itunol sa dili pa matapos ang school year 2015-2016.

Matud ni Mayor Moreno hapit na matibawas ang gitukod nga 42-classroom Agusan National High School, 24-classroom East City Central School sa Brgy Lapasan ug 21- classroom Carmen National High School sa Macanhan.

Dugang sa mayor ang 80-classroom Cagayan de Oro National High School sa Brgy Nazareth matibawas sa dili pa magsugod ang school year 2016-2017 karong Hunyo ug magamit na kini sa mga estudyante aron sa ingon masulbad na ang kahuot ug emergency classes nga dugay nang giantus sa mga magtutudlo ug mga kabataan.

Kahinumdoman nga mokabat na sa 441 ka mga lawak-saringan ang natukod sa administrasyon ni Mayor Moreno sulod lamang sa duha ka tuig nga pagdumala niini inabagan usab sa Local School Board gamit ang pundo sa Special Education Fund.

Tungod niini, mismo si DepEd Sec. Armin Luistro ang mihatag og pasidungog sa mayor isip ‘Education Champion’ tungod sa mga kalamboan nga nahimo sa natad sa edukasyon.