CDO-Banner

Tambal, stainless libre’ng maangkon sa JRBGH

Tambal, stainless libre’ng maangkon sa JRBGH

TUNGOD sa paningkamot sa administrasyon ni Mayor Oscar Moreno kauban ang mga kadagkoan sa JR Borja General Hospital (JRBGH), dili na suliran ang pagbaton og mga tambal alang niadtong modangop sa maong balay-tambalanan.

Kini human gipahibalo ni Dr Ramon Nery, chief executive officer sa JRBGH, nga 90.98 porsiyento nga mga panginahanglanon sa tambal ang natubag na niini ug libre kining madawat sa mga pasyente.

Matud ni Nery maihap na lang ang angayan pang itunol nga mga tambal ug anaa na sila sa proseso sa pagpatuman sa hingpit sa tanang gikinahanglan.

Gikalipay usab ni Nery ang pagpahibalo nga nagtanyag og libreng stainless ang City Hospital alang niadtong walay ikasarang ug nanginahanglan niini.

Si Elizabeth Casinillo, 66 anyos, mibutyag nga dako ang iyang kalipay tungod kay dili na siya mogasto alang sa pagpalit og tambal human kini nagpahiling sa JRBGH.

Bag-ohay lamang, laing grupo sa Rotary Club of Cagayan de Oro/Interplast ug Rotary Club of Balwyn Australia ang nitunol og 16 ka mga bag-o ug modernong hospital beds sa JRBGH ug mga ekipo nga mikabat sa P2.5 milyones.

Ang Rotary Club of Cagayan de Oro usa sa mga aktibong nakiglambigit sa City Hospital aron sa dugang pang kalamboan.