CDO-Banner

Dugang miyembro sa Pakigbisog Homeowners’ Association nakadawat sa ilang titulo sa yuta

web

 

 

DUGANG mga titulo sa yuta ang gitunol ni Mayor Oscar Moreno ngadto sa mga miyembro sa Pakigbisog Homeowners Ass’n sa Barangay 26 kaganihang buntag atol sa flag raising ceremony sa City Hall Enero 11, 2016.

Upat lang sa 15 ka mga benepisyaryo ang midawat sa ilang titulo sa yuta atol sa ceremonial awarding uban ni Atty. Edgar Cabanlas, chairman sa Task Force for Emancipation of the Piso-Piso Beneficiaries (TFEPB), Engr. Armen Cuenca ug mga personahi sa Task Force.

Si Atty. Cabanlas namahayag nga mokabat na sa 300 ka mga titulo ubos sa administrasyon ni Mayor Moreno ang nahatag ngadto sa mga Piso-Piso program beneficiaries.

Subay niini, dako ang pasalamat ni Rebecca Racid, presidenti sa Pakigbisog, kang Mayor Moreno nga nahatag ra gayud ang titulo sa yuta nga ilang gipangandoy nga mahuptan sa taas nga katuigan.

“Dili na gyud mi mahadlok nga ma-demolish. Bahala og mabahaan mi basta amo na ang yuta,” dugang ni Racid.

Gibutyag ni Racid nga adunay 182 ka mga pamilya nga miyembro ang Pakigbisog diin 101 na ang nahatagan og titulo sa yuta.

Samtang gipasalig ni Mayor Moreno nga magpadayon ang iyang programa nga paghatag og titulo sa yuta ngadto sa mga benepisyaryo dili lang sa Piso-Piso program apan sa mga molupyo sa mga resettlement site ning siyudad.