CDO-Banner

Warning & alert system gitunol sa syudad

Warning & alert system gitunol sa syudad

HINGPIT na nga gitunol sa nasud sa Korea pinaagi sa National Disaster Management Institute (NDMI) ang Automatic Rainfall Warning ug Flash Flood Alert System sa buhatan sa Philippine Atmospheric Geophysical and Astronomical Services Administration (Pagasa) nga gisaksihan sa lokal nga kagamhanan ning syudad sa pagpangulo ni Mayor Oscar Moreno karong adlawa, Enero 19, 2016.

Ang warning and alert system una nang gisugdan pagtaod ug pag-instalar sa nagkalain-laing dapit sa Cagayan de Oro sa delegasyon sa NDMI sa pagpangulo ni Dr. Keumho Oh, division head sa Disaster Prevention Research Division ug Dr. Chihun Lee ang principal researcher sa NDMI .

Ang maong proyekto gitawag og Northern Mindanao Project namugna human mihapak ang bagyong Sendong ug ang syudad sa Cagayan de Oro lamang ang napiling benepisyaryo sa maong proyekto.

Ang maong mga ekipo anaa nahimutang sa Brgy Balulang, City Hall, Consolacion, Bonbon, Macabalan, Pagatpat ug Iponan aron pagmatyag ug pagpahibalo sa katawhan ilabina sa nanimuyo daplin sa suba.

Lakip sa misaksi sa turn-over ceremony ang opisyales sa maong mga barangay, Pagasa Central Office nga gipangulohan ni Acting Administrator Vicente B. Malano, Pagasa El Salvador ug uban pa.

Sa pakigpulong ni Dr. Lee iyang gipadayag ang iyang dakong kalipay sa pagdawat ug kooperasyon sa administrasyon ni Mayor Moreno ug sa City Disaster Risk Reduction and Management Office (CDRRMO) sa kalampusan sa maong proyekto.

Tungod niini, nagpasalamat si Mayor Moreno sa nasud sa Korea nga nahimo na kining kaabag sukad pa sa probinsya sa Misamis Oriental.

Ang warning and alert system ning syudad operational 24 oras.