CDO-Banner

Scheduled collection sa Cogon Market sugdan sa Pebrero 1

Scheduled collection sa Cogon Market sugdan sa Pebrero 1

 

HUMAN sa duha ka bulan nga information and education campaign nga gihimo sa buhatan sa Solid Waste Management Division (SWMD) sa City Local Environment and Natural Resources Office (Clenro) sugdan na ang scheduled collection sa segregated waste sa Cogon Market ning syudad sa Pebrero 1 ning tuiga.

Matud ni Elvisa Mabelin, nangulo sa SWMD, una nilang ipatuman ang scheduled collection sa basura sulod mismo sa vegetable section sa merkado sa Cogon ug wala pay labot niini ang palibot gawas sa merkado.

Dugang ni Mabelin, ang schedule sa pagkolekta sa biodegradable matag alas 10:00 sa buntag hangtud alas 12:00 sa udto ug alas 5:00 sa hapon hangtud alas 9:00 sa gabii. Samtang ang non-biodegradable kolektahon sa alas 2:00 hangtud alas 4:00 sa hapon.

Gipasabot usab ni Mabelin nga tinguha sa ilang buhatan ang pagwagtang sa standby garbage truck panahon sa adlawan.

Ang biodegradable mao ang mosunod: sobra ug pan-os nga pagkaon, liso ug panit sa prutas ug mga gulay, alukaba (shell) sa kinhason, alimango, lobster, itlog, bukog, tinai ug hasang sa isda.

Ang non-biodegradable naglangkob sa papel, plastic, puthaw, botelya o bildo, guma ug uban pa.

Tungod niini nanawagan ang SWMD sa katawhan sa kooperasyon ug pagsunod sa Republic Act 9003 o Ecological Solid Waste Management Act of 2000.