CDO-Banner

JRBGH mahimo’ng premier LGU hospital

jrb

 

SA nakab-ot nga kalamboan ug kabag-ohan sa JR Borja General Hospital sa kapin duha ka tuig pa lamang nga panerbisyo ni Mayor Oscar Moreno, tataw nga makab-ot niini ang panlantaw nga mahimo kining nag-unang local government hospital sa tibuok nasud nga makabarog sa iyang kaugalingon ug adunay panlantaw ug pagtagad sa mga naglisod sa panginabuhian.

Kini nga panlantaw nasukod ug nasinati na sa dagha’ng pasyente nga nakadawat sa serbisyo ug pagtagad sa mga doctor ug nurse lakip mga personahe sa City Hospital sa panahon sa ilang panginahanglan.

Matud ni Dr. Ramon Nery, chief executive officer sa JRBGH, bisan pa man og nakasinati sila  og mga pagbabag sa pipila tungod sa mga reporma nga gipatuman sa maong hospital, apan wala kini nakapaluya sa mayor ug sa pamunoan sa JRBGH sa pagpadayon sa mga nasugdan’g reporma ilabina alang sa mga naglisod nga katawhan.

Kahinumdoman nga gipasidunggan ang JRBGH sa rehiyonal nga buhatan sa Philhealth tungod kay napili kining numero unong hospital sa tungod sa taas nga Philhealth benefit payments nga nadawat niini.

Sa sulat nga gipadala ni Philhealth Regional Vice President Datu Masiding M. Alonto, Jr ngadto kang Mayor Moreno, iyang gipasidunggan ang mayor ug ang JRBGH sa pagkahimo niining ranked 13sa tibuok nasud.

“JRBGH is now ranked 13th among the best performing health care providers in Philhealth benefit payments. The hospital has consistently increased in Philhealth generated income, earning P18.2 million in 2013 and P57.5 in 2014. It is safe to project that JRBGH would breach the P100 million mark for 2015.”

Una nang gibutyag ni Dr. Nery nga nakab-ot nila ang P100 milyon nga income pinaagi sa Philhealth benefit payments tungod sa pagsaka sa ihap sa mga pasyente nga midangop sa balay-tambalanan.