CDO-Banner

Hugpong sa kababayen-an ginansyado sa “Bigasan ng Barangay Project”

GINANSYADO ang hugpong sa mga kababayen-an nga nakapahimulos sa ‘Bigasan ng Barangay’, usa ka proyekto nga gidalit sa City Social Welfare and Development Office uban sa pagtambayayong sa Department of Labor and Employment.

Matud ni Ms. Phoebe Malinda, focal person on livelihood program sa CSWD, nga dul-an 65% ang nahimong ginansya sa hugpong sa kababayen-an sa negosyong bigasan matag barangay.

Adunay 72 ka grupo sa mga kababayen-an gikan sa 66 ka barangay ang nakapahimulos sa’ Bigasan ng Barangay’.

Ang pundo gikan sa DOLE nga mibubo og P2.4 milyones ka pesos aron masugdan ang proyekto sa milabayng tuig. Miabag usab ang syudad pinaagi sa pagpahigayon ug training-seminar aron andam ang mga hugpong pagdumala sa maong proyekto.

Tinguha sa buhatan sa pagpanguna ni CSWD Officer Teddy Sabuga-a nga matabangan kadtong mga katawhan nga walay capital sa pagtukod og usa ka negosyo nga makuhaan sa panginabuhian.

Gani man, ubos sa livelihood program sa syudad, ubay-ubay na ka mga katawhan ang natabangan aron mahaw-as sa kalisdanan.