CDO-Banner

Modernong Child Development Center sa Pagatpat matuman na

MODERNONG disenyo sa bag-ong Child Development Center ang mobarog sa dili madugay diha sa Barangay Pagatpat ubos ni Kapitan Achillles Jude ‘Gogoy’ Babaran.

Ang balor P800 mil kapin nga CDC kompleto sa modernong gamit sama sa comfort rooms, lababo, mga lamesa, bangko ug uban pa aron komportable ang pagtuon sa mga gagmay’ng kabataan.

Ang Pagatpat mao ang ikatulong barangay nga tukuran ni City Mayor Oscar Moreno sa moderno ug bag-ong Child Development Center nga gipunduhan gikan sa Special Education Fund pinaagi sa panugot sa Local School Board.

Sa kasamtangan, aduna nay natapos nga CDC diha sa barangay Tignapoloan ug sitio Macapaya sa barangay Camaman-an.

Gawas sa Pagatpat, pahimutangan usab og bag-ong Child Development Center o’ kanhi gitawag nga Day Care Center ang barangay Balubal ug Bugo.

Malaumon si CSWD Officer Teddy Sabuga-a nga matukoran ang tanang barangay sa bag-ong CDC aron makaangkon ang mga gagmay’ng kabataan nag-edad 3 hangtud 4 anyos sa hamogaway nga tunghaan.