CDO-Banner

Mga iresponsableng ginikanan mapahamtangan og silot base sa Parental Responsibility Code

GIPAHIBALO karon sa City Social Welfare and Development Office nga hingpit nang ipatuman sulod ning tuig ang Parental Responsibility Code, usa ka balaod nga nagmando sa mga ginikanan pagsunod sa mga responsibilidad nga nahisubay sa konstitusyon ug family code.

Unod niini ang angay buhaton sa mga ginikanan ngadto sa ilang mga anak sama sa pagpa-eskwela, pagsulbad sa suliran sa mga street children nga gagamit og rugby/vulcaseal, paglikay sa pagdaghan sa mga bata nga nakalapas sa balaod, pagprotehir sa mga kabataan batok sa tanang matang sa pang-abuso ug pag- abandonar. Paglig-on ug pagpahapsay sa Barangay Council for the Protection of Children aron maila ang dakbayan isip “Child-Friendly City”.

Kadtong mapamatud-an nga makalapas sa maong ordinansa mahimong mapasakaan sa kaso ug silot.

Sa unang notice of violation, kinahanglang moapil sa parent effectiveness service sessions nga dili moubos sa usa ka oras. Sa ikaduhang higayon, kinahanglan moapil gihapon sa nahisgutang parenting session sa dili moubos duha ka oras, ug tulo na ka oras nga session kung ikatulong higayon.

Adunay silot o’ multa nga balor P1,000.00 hangtud P5,000, pagkapriso gikan usa hangtud tulo ka bulan o’ pareho, depende sa desisyon sa korte.

Ang CSWD ang mopasaka sa kaso, base unya sa rekomendasyon sa Barangay Council for the Protection of Children (BCPC). (GOF)