CDO-Banner

Cagayan de Oro nakadawat sa Seal of Good Education Governance

DAKONG garbo sa syudad sa Cagayan de Oro nga napiling usa sa mga nakadawat sa prestihiyosong Seal of Good Education Governance gikan sa Synergeia Foundation atol sa gipahigayong National Education Summit sa kaulohan sa nilabay’ng semana.

Ang maong award nakabase sa mga kalampusan sa lokal nga kagamhanan pinaagi sa paningkamot ni Mayor Oscar Moreno sa pagpalambo sa edukasyon ning syudad diin usa na ang kabag-ohan nga gihimo niini diha sa pagmugna sa mga sakop sa Local School Board.

Ang Local School Board gilangkoban sa mga representante sa nagkalain-laing sector lakip mga pribadong tunghaan, business, interfaith ug youth sector.

Duha lamang ka syudad sa 285 ka mga local government units sa tibuok nasud ang nakadawat sa maong pasidungog ug lakip sa criteria sa maong award ang pagbaton sa mga tunghaan og aktibo’ng School Governing Council ug paglambo sa reading performance sa mga kabataan ug pagkunhod sa non-readers ug frustrated readers sa 15 porsiyento.

Makadawat usab ang syudad og P1.5 million isip incentive package gikan sa PLDT ug Smart Communications.

Kahinumdoman nga usa sa mga gitutokan ni Mayor Moreno ang edukayon ning syudad ilabina sa pampublikong tunghaan diin aktibo nang nakiglambigit ang komunidad lakip mga ginikanan diha sa pagtuon sa kabataan, mga barangay officials ug mga magtutudlo human sa mga pagbansay kanila nga gipasiugdahan sa lokal nga kagamhanan kauban ang Synergeia Foundation, PLDT ug Smart Communications ug uban pa.

Gani man mismo ang Department of Education ang mihatag usab og pasidungog kang Mayor Moreno isip Education Champion.

Tungod niini dako ang pasalamat sa Department of Education-Division of Cagayan de Oro sa pamunoan ni Mayor Moreno tungod sa mga kabag-ohan nga nasinati niini sukad sa iyang paglingkod sa syudad.

Ang edukasyon usa sa mga priority agenda sa Moreno administration. ###