CDO-Banner

12 KA BOKSIDOR SA CDO, RP TEAM MEMBERS NA!

NAILA karon ang dakbayan sa Cagayan de Oro nga tinubdan sa mga banggiitang boksingero nga maoy modala sa bandera ug dungog sa Pilipinas sa mga kompetisyon gawas sa nasud.

Kini ang gipasigarbo ni Mr. Elmer Pamisa, ang head coach sa Cagayan de Oro City Boxing Team kinsa miingon nga 12 na ka mga amateur boxers sa dakbayan ang kasamtangang miyembro karon sa RP national boxing team.

Siyam kanila ang lalake ug tulo ang babaye, sigun pa ni coach Pamisa.

Sila mao si Carlo Paalam, John Vincent Pangga, Daniel Maamo, Marvin Tabamo, Mark Lumbab, Sugarey Ocania, James Ian Pangga, Regemelyr Namocatcat, Jurdgs Nuez, Judelyn Casin, Gina Casin ug Gemma Baja.    

Ug ang rason niini tungod sa maayong pagdumala sa amateur boxing development program ni Mayor Oscar Moreno sukad pa kini nahimong Gobernador sa probinsya sa Misamis Oriental hangtud nga napiling mayor sa Cagayan de Oro, matud pa ni Pamisa.

Dili lang ang mga amateur boxers sa Cagayan de Oro ang nahatagan sa kahigayonan nga mahimong sakop sa RP national boxing team, apan labaw sa tanan kadtong ‘pioneer boxers’ kon mga pirmerong produkto kinsa kampeon na karon sa professional boxing.

Si IBF junior flyweight champion Milan ‘El Metodico’ Melindo; ang popular nga Pagara brothers nga si Jason ‘El Nino’ Pagara ug Prince Albert Pagara ang pipila lang sa mga malampusong produkto sa boxing program ni Mayor Moreno.

Dako kaayo ang pasalamat ni coach Pamisa sa hugot ug makanunayong suporta ni Mayor Moreno sa boxing program tungod kay adunay mahayag nga kaugmaon ang nagpaabot sa mga batang boksingero, puhon, ugma damlag. (Ian Fuentes/CIO)