CDO-Banner

Katukoran sa North Wing Building sa City Hospital sugdan na

DAKO ang kalipay sa mga kawani ug pamunoan sa JR Borja General Hospital nga masugdan na gayud ang katukoran sa North Wing Building sa City Hospital human kini gisubhan sa pagpangulo ni Mayor Oscar Moreno.

Matud ni Mayor Moreno usa na usab kini sa mga milestone sa iyang administrasyon ug sa syudad sa Cagayan de Oro diin masaksihan ang dako na nga kalamboan sa City Hospital sukad kini natukod niadtong Agosto 25, 1963 sa pagpamuno ni kanhi Mayor Justiniano Borja.

“We’ve gone a long way and this is a one way of paying a tribute to the man who made it happen, Mayor Justiniano Borja,” saysay ni Mayor Moreno.

Ang North Wing Building nahatagan og katumanan pinaagi sa Health Facilities Enhancement Program (HFEP) sa Department of Health diin mokabat P70.5 milyones ang pundo nga gigahin niini.

Matud ni Dr Ramon Nery, acting chief of hospital sa JRBGH, ang groundbreaking ceremony nagbukas sa ikaduhang hugna sa kasaysayan sa City Hospital diin tumong sa Moreno administration nga mahimo kining “Medical Center of Choice” dili lamang sa Cagayan de Oro apan sa tibuok rehiyon 10.

Tungod niini paningkamotan sa pamunoan sa City Hospital nga maalagaran ang katawhan ilabina ang mga nanginahanglan.

Dako usab ang pasalamat ni Dr Nery sa mga sakop sa konseho sa pagpangulo ni Bise Mayor Rainier Joaquin Uy sa makanunayong suporta sa programang panlawas.

Lakip sa misaksi sa groundbreaking ang kadagkoan sa DOH, Philhealth 10, Red Cross, mga opisyales sa lokal nga kagamhanan, Kagawad Ma Lourdes Gaane, Kagawad George Goking, Kagawad Jay Roa Pascual, Kagawad Reuben Daba, Kagawad Suzette Magtajas Daba, Kagawad Teodulfo Lao ug Kagawad Annie Daba. ###