GIPASIGARBO sa mga opisyales pinangulohan sa mga barangay kapitan, kauban ang barangay kagawad, secretary ug treasurer sa 80 ka barangay sa Cagayan de Oro ang ilang talento sa pagsayaw atol sa Liga Night 2024: Philippine Festivals, Agosto 23, 2024 sa Rio de Oro Boulevard ning syudad.

 

Atol sa maong kalihokan, nagtigi ang upat ka mga distrito sa ilang performances sa nagkadaiyang Philippine Festival nga naglangkob sa District 1 – Panagbenga Festival, District 2 – Lansonez Festival, District 4 – Sinulog Festival, District 3 – Bonok Bonok Festival.

 

Ang district 1 gilangkoban sa Baikingon, Balulang, Bayanga, Besigan, Bulua, Canitoan, Carmen, Dansolihon, Iponan, Lumbia, Mambuaya, Pagatpat, Pagalungan, Pigsag-an, San Simon, Taglimao, Tagpangi, Tignapoloan, Tuburan ug Tumpagon. Ang district 2 usab naglangkob sa Barangay 13, 14, 15, 16, 17, 18, 19,20, 21, 22, 23, 25, 26, Bayabas, Bonbon, Consolacion, Kauswagan, Macabalan, Patag ug Puntod. Samtang ang district 3 usab mao Barangay 24, 27, 28, 29, 30, 31, 32, 33, 34, 35, 36, Agusan, Balubal, Bugo, Cugman, FS Catanico, Gusa, Lapasan, Puerto ug Tablon. Ang district 4 gilangkoban sa Barangay 1, 2, 3, 4, 5, 6, 7, 8, 9, 10, 11, 12, 37, 38, 39, 40, Camaman-an, Indahag, Macasandig ug Nazareth.

 

Nahimong grand champion sa Philippine Festival competition ang District 4 – Sinulog Festival, gisundan sa District 2 – Lansonez Festival isip 1st placer, 2nd placer ang District 1 Panagbenga Festival ug 3rd placer ang District 3 – Bonok Bonok Festival.

 

Alang usab sa Festival Booth competition nasakmit sa District 2 – Lansones Festival ang kadaogan isip grand champion, gisundan sa District 1 – Panagbenga Festival isip 1st placer, 2nd placer usab ang District 4 – Sinulog Festival ug 3rd placer ang District 3 – Bonok Bonok Festival.

 

Midaog usab isip Festival King si Barangay Carmen Kapitan Joaquin Rainer ‘Kikang’ Uy ug nahimong Festival Queen si barangay Camaman-an Kagawad Jasmine Borja.

 

Dako ang pasalamat ni City Mayor Rolando ‘Klarex’ Uy sa mainitong suporta sa mga kabaranggayan dili lang sa nasangpit nga Liga ng mga Barangay Night apan lakip na sa tanang mga kalihokan sa syudad alayon sa usa ka bulan kasaulogan sa Higalaay Festival 2024 agi’g pagtamod sa kapistahan ni Senyor San Agustin, patron sa Cagayan de Oro.

 

Gihingusgan ni Mayor Klarex ang kamahinungdanon sa panaghiusa ug pagtinabanga sa matag barangay alang sa pag-uswag sa dakbayan. (AGP/Photos by Rod Constantino/CIO)