Mipailawom sa Community Needs Assessment/Orientation ang kapin 400 ka mga aplikante sa Klarexville Pagatpat Valley Residences relocation site, Huwebes, Oktobre 3, 2024, ubos sa inisyatiba sa administrasyon ni Mayor Rolando `Klarex’ Uy pinaagi sa City Housing and Urban Development Department (CHUDD) kauban sa Social Housing Finance Corporation (SHFC).

 

Sa iyang mensahe gipahalipayan ni Mayor Rolando `Klarex’ Uy ang mga aplikante kay mahatagan na og katumanan ang ilang pangandoy nga makabaton og disente nga pinuy-anan nga maoy gipaningkamutan sa kagamhanan.

 

Gipasalamatan usab ni Mayor Klarex ang mga kadagkuan sa SHFC sa makanunayon nga pagsuporta sa housing program sa syudad aron mahatagan og hayahay nga pinuy-anan ang mga informal settler families (ISFs) sa syudad.

 

Samtang gipasabot sa SHFC Officer-in-Charge Manager Janet T. Lumayag sa mga aplikante ang mga rekisitos ug gabayan sa SHFC alang sa ilang application sa housing program sa syudad.

 

Ang Klarexville Pagatpat Valley Residences anaa sa Pamalihi, Barangay Pagatpat diin mokabat 10 ka 5-storey building ang gikatakdang pagatukuron sa administrasyon ni Mayor Klarex in partnership sa Social Housing Finance Corporation (SHFC) ilawom sa Pambansang Pabahay Para sa Pilipino (4PH) Program sa national government. (ALR/CIO/Photos by Jay Arancon & Reynan Baylin/CIO)