GIPASIDUNGGAN sa City Anti-Drug Abuse Council (CADAC) nga gipangulohan ni Mayor Rolando `Klarex” Uy ug Barangay Anti-Drug Abuse Council (BADAC) ang Barangay Camaman-an human napili isip Best BADAC 2024 atol sa gipahigayon nga Search for Best BADAC 2024.

 

Ang pasidungog gihimo atol pagtapos sa kasaulogan sa Drug Abuse Prevention and Control (DAPC) Month 2024 nga gipahigayon sa Activity Center sa Centrio Ayala, Sabado, Nobyembre 30, 2024.

 

Mismo si Punong Barangay Carl Harrison D. Galarrita ang midawat sa pasidungog uban ang cash prize nga P35,000.00 nga gitunol nila ni Oliver Egypto, department manager sa Office of the City Community Affairs Department, Dr. Rhyselle Bernadette Melliza-Descallar, head sa City Anti-Drug Abuse Division – Oro Wellness Center uban sa kadagkuan sa City DILG, ug COCPO.

 

Nahimo usab nga 1st runner-up ang BADAC sa Barangay Lapasan nga adunay cash prize nga P20K ug plaque, naangkon sa BADAC sa Barangay Carmen ang ikaduhang dapit uban ang premyo nga P15K + plaque, samtang nakuha sa BADAC sa Barangay Balulang ang ikatulong dapit uban sa cash prize nga P10K plus plaque.

 

Naglaum si Dr. Descallar nga mahimong inspirasyon sa ubang barangay nga mas hingusgan nila ang pagpalig-on ug pagpatuman sa mga programa ug gabayan sa ilang BADAC alayon sa programa sa CADAC aron makab-ot ang tinguha nga drug-free city. (ALR/CIO/Photos by Kim Zaldivar & Roel Felicitas/CIO)