SUBLING naghangyo si Mayor Rolando “Klarex” Uy sa tanang kabarangayan sa ilang kooperasyon ug pagtinabangay diha sa pag-atiman ug pagtubag sa hisgutanan sa basura dinhi ning syudad.

 

Kini human nagpagula si Mayor Klarex og usa ka kamanduan subay sa Section 17 sa Republic Act 9003 kon Ecological Solid Waste Management Act of 2000 nga nagmando sa tanang barangay sa ilang nag-unang responsibilidad sa pag-segregate ug pagkuha sa mga basura, ingon man pagbutang og Material Recovery Facility (MRF).

 

Lakip sa mandato sa matag barangay ang pagsiguro nga adunay segregation sa matag panimalay, establisemento ug pagpahigayon og education and information campaign sa ilang barangay.

 

Basi usab sa maong kamandoan ni Mayor Klarex, kinahanglan nga magpahibalo ang barangay sa mga lugar nga adunay mga basura nga wala pa nakuha, ingon man pagpahibalo sa mga residente sa kamahinungdanon sa waste segregation.

 

Giaghat usab sa mayor ang mga kapitan nga sundon sa mga residente ang ensaktong schedule sa paglabay sa basura, pag-monitor sa koleksyon, ug pagpahamtang og silot, uban sa suporta sa City Local Environment and Natural Resources Office (CLENRO). (ACM/CIO)