SUBLING abrihan ug dili na plastaran og mamaligyaay ang dalan Osmeña paingon sa Ramon-Chavez diha sa Cogon market area, sigun kini sa laraw sa Night Market Management Committee (NMMC) atol sa meeting adalw’ng Huwebes, Marso 6, 2025.

 

Si Atty. Jose Edgardo Uy, head sa NMMC namahayag nga pipila sa mga dagkong rason sa laraw nga pag-abri sa gitumbok nga mga dalan mao ang traffic congestion diin daghang mga motorista ug pedestrian ang nagreklamo tungod sa traffic.

 

Dugang pa, mao kini ang reklamo sa mga stallholders sa 2nd floor sa Cogon market nga dili na mahalinan ilabina nga mga utanon ug panakot gihapon ang baligya sa mga sidewalk vendors hinungdan nga dili na mosaka sa taas sa merkado ang mga mamalitay.

 

Gipasabot sa NMMC nga nagbayad og business permit, ug renta ang mga stallholders sa Cogon market ug dili usab makatarunganon nga dili paminawon ang ilang reklamo.

 

Apan dili mabalaka ang maapektuhan nga mga sidewalk vendors sa dalan Osmeñ ug Ramon-Chavez kay iplastar gihapon sila sa lahi nga area.

 

Ang usa sa dagkong rason mao usab ang panahon sa emerhensya labina sa sunog partikular na sa Cogon market area diin maglisod og lusot ang mga firetrucks kay anaa man ang mga vendors nagplastar sa dalan. (ALR/CIO/Photos by Jomar Figuracion/CIO)