PORMAL nang gibuksan sa siyudad ang National Women’s Month, adlaw’ng Biyernes, Marso 7 ning tuig.

 

Kini gibuksan pinaagi sa santos nga misa nga gipahigayon sa City Hall quadrangle diin gisalmotan ni City Gender and Development Focal Point System Co-chairperson Sheila Lumbatan, Vice Mayor Bebot Rodriguez, city hall employees, nagkadaiyang national government agencies, barangay ug uban pa.

 

Gani, sa wala pa natapos ang misa, mipadayag sa iyang mensahe si Vice Mayor Bebot Rodriguez diin iyang gipahimangnoan ang mga kababay-enan sa ilang papel isip inahan ug babae sa pamilya.

 

“Isip usa ka inahan, isip usa ka babaye, ga-empower kita sa atong katilingban nga mao’y haligi sa atong kaugalingong panimalay. Kita ang giya kay kita, una sa tanan ang atong role sa isa ka inahan, isip babaye, mao ang pag-ampo para sa atong sa pamilya,” saysay ni Vice Mayor Bebot Rodriguez.

 

Kini gisundan sa motorcade nga gisalmotan sa nagkadaiyang buhatan sa city hall, mga barangay ning syudad, national government agencies ug uban pa.

 

Gawas sa santos nga misa ug motorcade, gipahigayun usab ang usa ka zumba contest nga gisalmotan sa mga barangay diha sa Gaston Park.

 

Ang kick-off activity gipangulohan sa City Gender and Development Focal Point System ubos sa tema nga “Babae sa lahat ng sektor, Aangat ang bukas sa Bagong Pilipinas,” uban sa tinguha nga ma-siguro nga ang tanang kababayen-an ning siyudad molambo. (NLB/CIO/photos by Kim Zaldivar and Jomar Figuracion/CIO).