MALAMPUSONG gipahigayon ang Brigada Eskwela Onboarding ug RISE Care Services pinaagi sa panag-uban ug kooperasyon sa lokal nga kagamhanan pinangulohan ni City Mayor Rolando 'Klarex' Uy ug sa Department of Education (DepEd) sa pagpangulo Schools Division Superintendent Dr. Roy Angelo Gazo.

 

Ang maong kalihokan gipahigayon sulod sa tulo ka adlaw, gikan Hunyo 9 hangtod 11, sa tulo ka napiling tunghaan sa dakbayan.

 

Gisugdan kini niadtong Hunyo 9 sa Dunggoan Integrated School nga adunay 114 ka magtutungha, gisundan sa Hunyo 10 sa Brgy Taglimao nga adunay 254 ka magtutungha, ug natapos niadtong Hunyo 11 sa Malasag Elementary School nga adunay 242 ka magtutungha, nga adunay kinatibuk-ang gidaghanon nga 610 ka estudyante.

 

Tumong sa maong kalihukan nga matabangan ang estudyante ug andam na alang sa umaabot nga pagbukas sa klase samtang gipalig-on usab ang ilang kahimtang sa panglawas nga mahinungdanon sa ilang pagkat-on.

 

Ang serbisyo kabahin sa priority agenda ni Mayor Klarex nga RISE—Regionalization and Metropolization, Institutional Development, Security and Safety, Economic Recovery, ug Sustainability.

 

Uban sa suporta sa City Inter-agency Committee (CIAC), kauban ang LGU sa DepEd sa paghatag og serbisyo ug logistical support alang sa kaayuhan sa mga magtutungha.

 

Lakip sa kalihukan ang health profiling ug medical services sa City Health Office, ug paghatag og kahibalo ug pag-andam batok kalamidad ug kaluwasan pinaagi usab sa mga personahe sa CDRRMD. (MDS/CIO/Photos Courtesy of CIAC)