HUGOT nga gihangyo ni Mayor Rolando `Klarex’ Uy ngadto sa mga kadagkuan sa Night Market Management Committee (NMMC), Roads and Traffic Administration (RTA), ug City Economic Enterprises and Business Development Administration (CEEBDA) nga mabalhin na sa laing lugar ang mga sidewalk vendors ug alacart nga naka-pwesto karon sa may dalan J.R. Borja ug Capt. Vicente Roa.

 

Matud ni Mayor Klarex nga dugay na niya namatikdan ug nakita nga namalik na usab ang mga sidewalk vendors ug alacart sa maong mga dalan nga unta gihatagan na man sila og insaktong lugar ug puwesto nga didto sila mamaligya.

 

Gipasabot sa mayor nga ang maong mga dalan giandam alang sa dili matagna nga mga emerhensiya ug kalamidad ilabina sa sunog nga makaagi diretso ang mga firetrucks alang sa ilang pagresponde.

 

“Maong naghangyo ko sa akong mga kauban nga inig suroy nako kinahanglan wala na gyud,” dugang ni Mayor Klarex atol sa ceremonial turnover sa Project Lunhaw diha sa Divisoria, Miyerkules Hunyo 11, 2025.

 

Dugang pa sa mayor nga alang sa kaayohan sa tanan ang tumong pagbalhin sa mga sidewalk vendors sa nasangpit nga mga dalan ug taas na usab nga panahon ug kahigayonan ang gihatag kanila aron sila makapamaligya. (ALR/CIO/Photos by Kim Zaldivar/CIO)