GARBO ug kalipay sa dakbayan sa Cagayan de Oro ubos sa administrasyon ni Mayor Rolando “Klarex” Uy nga nalakip sa 2025 OVP Pasidungog diin mismo si Vice President Sara Duterte ang mitunol sa maong award nga gipahigayon sa SMX Convention Center, Lanang, Davao City bag-ohay lang.

 

Ang annual OVP Pasidungog usa ka selebrasyon alang sa pagtinabangay, pag-ila ug pagdayeg sa matag indibidwal ug partner agencies kinsa nakatabang sa mga nag-unang tahas sa Office of the Vice President diha sa pag-alagad sa katawhan ug nation-building.

 

Lakip sa midawat sa pasidungog ang buhatan sa City Disaster Risk Reduction and Management Department sa pagpangulo ni Mr Nick Jabagat, City Social Welfare Development Office sa pagpangulo usab ni Ms. Anecia Tongson.

 

Samtang gipasidunggan usab ang Barangay Carmen ubos sa liderato ni Punong Barangay Rainier Joaquin “Kikang” Uy isip mga bag-ong partner sa pag-alagad ug sa pagpanday sa mauswagong nasud.

 

Ang maong selebrasyon gitambongan sa kapin 1,000 ka mga partners gikan sa private sector, government agencies, ug key personalities sa tibuok rehiyon sa nasud. (ACM/Photos courtesy of Office of the Vice President)