MALAMPUSONG mitapos ang moabot sa 120 ka mga kabatan-onan sa Cagayan de Oro sa 10-day soft/core skills training ubos sa programang JobStart Philippines – Wave 10 sa pagpangulo sa Department of Labor and Employment (DOLE) kauban ang Public Employment Services Office (PESO-CDO) sa kagamahanang lokal, Hunyo 27, 2025.

 

Ang JobStart program gipanday ubos sa Republic Act 10869 sa tinguha nga ma-andam ang mga kabatan-onan sa pagpanarbaho pinaagi sa mga nagkadaiyang trainings.

 

Nasayran kini nga programa alang lamang sa mga Pilipino 18 ngadto 24 anyos, wala nag-eskwela, wala nagtrabaho ug wala mipailawom sa training atol sa pagrehistro.

 

Ang graduation ceremony gipangulohan ni PESO Manager Kathleen Kate Sorilla kauban si DOLE-X Regional Director Atty. Joeffrey Suyao, DOLE-X CDO Field Office Director Emmanuel Toledo uban sa hugot nga suporta sa Learning to Earning Pathways organization pinaagi ni LEAP coordinator James Sandy Galamiton.

 

Atol sa kalihokan, gipadangat ni SK Federation President Kenneth John Sacala ang iyang mainitong pagtimbaya sa mga kabatan-onan nga jobstarters nga nagpakita sa ilang kaikag pagtapos sa programa.

 

Gidayeg usab ni Councilor Sacala ang programa sa DOLE nga maghatag tulay sa mga kabatan-onan nga makasulod sa disenteng trabaho.

 

Nagpasalamat usab kini sa makanunayong suporta ni Mayor Rolando Klarex Uy sa mga programa nga nagtinguha sa kalamboan sa mga kabatan-onan.

 

Human sa graduation ceremony, gipahigayon usab ang exclusive job fair alang sa mga JobStarters diin pipila kanila ang mga na-hired on the spot. (AGP/Photos by Kim Zaldivar/CIO)