GIABI-ABI ni Mayor Klarex Uy ang katapusang batch sa nadugang nga Hawak Kamay-MKU scholarship program, Hulyo 18 sa City Hall quadrangle.

 

Mokabat sa 866 ang nadugang sa katapusang batch sa bag-ong nadawat nga city scholars ug sila motungha sa PHINMA-Cagayan de Oro College kon PHINMA-COC diin mao'y mohatag sa 75% nga libreng tuition, miscellaneous fees ug laboratory fees samtang 25% ang bayaran usab sa LGU-CDO.

 

Atol sa maong kalihokan, gipahinumdoman ni Mayor Klarex Uy nga higugmaon ang ilang mga ginikanan sanglit sila ang kanunay nila’ng maka-uban sa pagkab-ot sa ilang pangandoy ug dili ang barkada.

 

"Usbon ko, ang barkada dili parehas sa inyong ginikanan, aa panahon sa daghan nga problema, ginikanan ra gyud ang bugtong makig-uban kaninyo ug wala’y lain nga duolan ninyo sa panahon nga kamo maglisud. Ang ginikanan dili mobiya busa kamo, kung gusto mo magmalampuson sa inyong kinabuhi, higugmaa ang inyong ginikanan,” saysay ni Mayor Klarex Uy.

 

Dugang sa mayor, ang Ginoo ang angay pasalamatan sa 'second chance' ug dili siya. “Hinaut magmapasalamaton mo sa Ginoo sa higayon, sa chance nga akong gihatag kaninyo. Dili ako ang angay pasamatan kung dili ang Ginoo ang angay ninyo pasalamatan. Hinaut nga makalampus gyud kamo sa inyong pangandoy, sa inyong tinguha sa pagpangandam sa maayo nga kaugmaon busa ayaw usiki ang maong higayun nga gihatag nako kaninyo,” dugang ni Mayor Klarex Uy.

 

Sa laing bahin, mitambong usab sa kalihokan si City Councilor Moreno “Jing” Daba, chairperson sa Committee on Education sa 21st City Council kauban si kanhi Councilor Suzette Magtajas-Daba, City Councilor Al Legaspi Sr., mga personahe sa City Education and Development Office (CEDO) pinangunahan ni CEDO Department Manager Richel Petalcurin-Dahay, mga personahe sa City Mayor’s Office.

 

Ang HKMKU scholarship program usa ka pakigtambayayong sa PHINMA-COC ug ni Mayor Klarex diin maoy tumong ang paghatag og higayon nga makaeskwela kadtong mga city scholar applicants nga wala mi-qualify sa city scholarship program application ug mga Out-of-school Youth. (NLB/CIO/photos by Iren Fuentes/CIO)