MAPASALAMATON ang 75 ka beneficiaries sa Relevant Industry Skills for Employment -Technical Vocational Education Training (RISE-TVET) scholarship kinsa mikuha sa NC II Barista coffee roasting ug latte making human sila migradwar, Hulyo 17 sa Kape Turismo, Barangay Mambuaya, ning siyudad.

 

Sumala ni Emmanuel Borres III, usa sa migradwar nga Out-of-School youth ug taga Barangay Carmen, nga kini usa ka dako nga grasya sanglit gikan man kini sa pamilya sa mga barista ug aduna’y plano manimpalad sa laing nasud: “Thankful ko sa gihatag nga scholarship nga makatuon ko og bag-ong skills. Kani man gyud akong family, barista. Mao pud akong plano kay para puhon maka-abroad ko. Mapasalamaton ko sa City Education and Development Office, sa mga instructor nako sa Jamaican F&B Training and Assessment Center ug kang Mayor Klarex Uy,” saysay ni Borres.

 

Nasayran ang maong scholarship milungtad sa 23 days diin ang Jamaican F&B Training and Assessment Center mismo ang mi-train kanila samtang ang LGU-CDO pinaagi sa City Education and Development Office (CEDO) pinanuganahan ni CEDO Department Manager Richel Petalcurin-Dahay mao’y mi-shoulder sa cost of training ug TESDA assessment sa matag usa kanila.

 

Gawas sa Barista coffee roasting ug latte making, nagtanyag usab og NC II ubos sa RISE-TVET scholarship nga gilangkoban sa Bartending, Bread and Pastry Production, Computer Systems Servicing, Cookery, Driving, Food and Beverage Services, Heavy Equipment Operation, Shielded Metal Arc Welding ug uban pa.

 

Ang NC II Barista coffee roasting ug latte making kabahin sa RISE-TVET scholarship ubos sa administrasyon ni Mayor Klarex Uy pinaagi sa CEDO uban sa Jamaican F&B Training and Assessment Center kansang tumong ang mahatagan og oportunidad ang mga wala’y trabaho, mga Out-of-School Youth nga makakat-on ug makahatag og skilled workers sa nagkadako ug malamboon nga industriya sa kape sa Cagayan de Oro. (NLB/CIO/photos by Iren Fuentes/CIO)