GILAUMAN nga mahawan ug mawala na ang mga illegal structures diha sa Binono-an Creek sa Barangay Carmen, human nagpahigayon og laing hugna sa clearing operation ang Task Group Demolition sa syudad pinaagi sa hangyo ni Punong Barangay Raineir Joaquin “KapKik” Uy sa Barangay Carmen.

 

Inabagan sa mga personahi sa Barangay Carmen, ang portion na usab sa dalan Ipil ug Vamenta Boulevard ang gipailawom sa clearing operation sa pagpanguna sa TG Demolition pinangulohan ni Antonio Resma Jr.

 

Ang paghawan sa maong lugar nga subay sa Binono-an Creek maoy usa sa gihingusgan ni PB Uy alayon usab sa mga programa sa syudad ubos sa administrasyon ni Mayor Rolando `Klarex’ Uy nga limpyohan ang mga creek pinaagi sa Hapsay Sapa Team aron malikayan ang grabe nga pagbaha.

 

Gani, ubay-ubay na sa mga illegal settler families (ISFs) nga nanimuyo daplin sa maong creek ug sa palibot ang gisiguro ni PB Uy ug Mayor Klarex nga mabalhin sa relocation sites ug nahatagan og panimalay.

 

Naglaum si PB Uy nga hingpit nang mahawan ug mawala ang mga illegal structures sa maong lugar alang sa umaabot nga proyekto partikular na ang drainage system. (ALR/CIO/Photos by Reynan Baylin/CIO)