GIPANGANDAMAN sa kagamhanang lokal sa pagpangulo sa Cagayan de Oro Fiesta Committee Chairperson Mayor Rolando ‘Klarex’ Uy ang seguridad sa publiko, event organizers, mga dumuduong ug sa kinatibuk-an alang sa pagpahigayon sa tanan’ng mga kalihokan karong Agosto alayon sa Higalaay Festival 2025.

 

Atol sa laing hugna nga coordination meeting kagahapon, Hulyo 30, nga gipangulohan nila ni Fiesta Committee co-chairpersons Ms Sheila B. Lumbatan ug City Councilor Joyleen Balaba nga gitambongan sa nagkadaiyang myembro sa komitiba sa city hall, kauban usab ang ahensya sa Bureau of Fire Protection, Cagayan de Oro Police Office, Philippine Coast Guard, Task Force Oro gihingusgan ang security plan sa matag aktibidad ilabina sa mga tinuig nga dinagkong aktibidad.

 

Alayon niini subay sa naandan, gikatakda usab ang pag-activate sa City Disaster Risk Reduction and Management Council – Incident Management Team sa dili pa ang Higalaay Festival 2025 Grand Launching karong Agosto 8 diha sa Rio de Oro Boulevard.

 

Kini agi’g pagsiguro nga taliwala sa kasadya mamahimong luwas, hapsay ug malinawon ang kasaulogan sa kapistahan ni Senyor San Agustin ang patron sa Cagayan de Oro.

 

Nasayran nga ang Higalaay Festival 2025 sumpay usab sa 75th Diamond Jubilee celebration sa pagka-himugso sa dakbayan ubos sa tema, “Mapasigarbuhon sa Kagikan, Madasigon sa mga damgo”. (AGP/Photos by Reynan Baylin/Harry Tibon/Jerome Jungco/CIO)