MAPASALAMATON ang 574 ka molupyo sa Barangay Dansolihon human gidala ni Mayor Klarex Uy ang People’s Day sa ilang tugkaran, Agosto 18, diha mismo sa Barangay Dansolihon Hall, ning siyudad.

 

Usa niini si Flordeliza Monares, taga Sitio Sta. Cruz, Dansolihon, kinsa tuyong miadto aron makabenepisyo sa libreng check-up.

 

Sumala ni Nanay Flordiliza, mapasalamaton siya tungod kay dugay na siyang nag-antus sa iyang balatian apan wala’y igong kwarta para macheck-up.

 

Atol sa People’s Day, gipahigayon ang flagraising ceremony pinangunahan sa Barangay Dansolihon council ubos sa pagpangulo ni Punong Barangay Ogie Roa kinsa kinakasingkasing nagpasalamat ni Mayor Klarex Uy sa pagdala sa People’s Day sa ilang barangay.

 

Kini gisundan sa pagpasabot ni Mayor Klarex nga matinud-anon ang iyang pag-alagad kanila ug ang People’s Day adlaw para kanila.

 

“Matinud-anon kami nga moalagad kaninyo sa tanan panahon, duol kamo kanamo. Nagpasalamat ako kaninyo sa inyong pagsalig ug karong adlawa, adlaw para kaninyo,”saysay ni Mayor Klarex.

 

Lakip sa batakang serbisyo nga natagamtaman sa mga taga Barangay Dansolihon ang libreng check-up, tambal, duha ka kilo nga bugas, wheelchair ug pagtubag sa inquiry kabahin sa scholarship, job application, late birth registration ug uban pa.

 

Sa laing bahin, mitambong sa People’s Day City Indigenous Mandatory Representative Roberto “Datu Makilala” Cabaring, City Councilor Moreno “Jing” Daba IV, City Councilor Al Legaspi Sr., City Councilor Juancho “Antuy” Roa-Pascual ug City Councilor Des Dahino, City Councilor Roger Abaday ug City Councilor George Goking.

 

Nasayrang gadal-on ni Mayor Klarex ang People’s Day matag ikaduhang Lunes hangtud pinakaulahi na Lunes sa bulan sa mga kabaranggayan dungan sa ilang flagraising ceremony. (NLB/CIO photos by Kim Zaldivar and Jhoanne Abejo)