GIPAILAWOM sa Anti-Red Tape Authority – Northern Mindanao ang mga punong barangay ug mga barangay secretaries gikan sa 80 ka mga barangay sa Cagayan de Oro sa 3-day Citizens Charter seminar-workshop, adlaw’ng Lunes, Agosto 18 kutob Agosto 20, 2025, diha sa De Luxe Hotel ning syudad.

 

Ang nasangpit nga seminar-workshop gipangulohan sa ARTA Region 10 sa pagpanguna ni Supervising Administrative Officer Dominic Sanchez, uban sa hugot nga suporta sa kagamhanang lokal pinaagi sa Community Affairs Office, ug sa Liga ng mga Barangay.

 

Kini agi’g katumanan usab sa paningkamot sa nasudnon ug lokal nga kagamhanan sa pagduso sa nalatid sa Republic Act 11032 kon “Ease of Doing Business and Efficient Government Service Delivery Act of 2018” ug sa hingpit nga pagpakgang sa ‘Red Tape’ practices sa mga government transactions sa tanang ang-ang sa pang-gobyerno.

 

Mitambong sa pagbukas sa tulo ka adlaw nga pagbansay si City Director Ellaine Josephine B. Depaur, sa Department of the Interior and Local Government – CDO, ug CDO Committee on Anti-Red Tape (CART) Vice-chair ug Local Economic Development and Investment Promotions Officer Mr. John Asuncion.

 

Pinaagi ni City Administrator Atty. Roy Hilario Raagas, gipadangat usab ni Mayor Rolando ‘Klarex’ Uy, kinsa chair usab sa CDO CART, ang iyang pasalamat sa rehiyonal nga ahensya sa ARTA sa paghimo og kalihokan nga mabansay ang mga kabaranggayan aron mas-mapasayon, mapapaspas, mapahapsay ang mga transaksyon sa gobyerno sa tinguha nga mas epektibong maalagaran ang katawhan.

 

Laraw niining 3-day seminar-workshop nga gipahigayon sa ARTA NGA magabayan ang mga kabarangayan sa pagama sa ilang kaugalingong Citizens Charter. (AGP/Photos by Reynan Baylin/CIO)