MIKABAT sa liboan ka tawo ang mapasalamaton nga nakabenepisyo sa gipahigayong People’s Day ni Mayor Klarex Uy karong adlawa, Septyembre 3, diha sa Tourism Hall ning syudad.

 

Nasayran nga matag unang Miyerkules sa bulan, ang programang People’s day sa City Hall ug pagadalhon dayon sa nagkalain-laing tugkaran sa mga barangay matag ikaduha hangtud sa katapusang Lunes sa bulan.

 

Usa sa nakabenispesyo karong adlawa si Kenneth Palahang Figuracion molupyo sa Barangay Carmen, 23 anyos, usa ka Criminology Board Passer atong Marso nga miduol ka Mayor Klarex aron matabangan pangita ug trabaho.

 

Nasayran nga si Kenneth, usa sa nakapahimulos sa City Scholarship Program kun Iskolar sa Dakbayan (ISDA) ni Mayor Klarex Uy sulod sa upat ka tuig.

 

“Dako akong pasalamat sa iya kay dili lang ako ang matabangan kundili daghan pa kayo,” saysay ni Figuracion.

 

Ang People’s Day gilangkoban sa nagkadaiyang serbisyo sa buhatan sa city hall sama sa paghatag assistance sa job application diin mahatagan og higayon makakitag trabaho ang mga katawhan nga nanginahanglan.

 

Pinaagi sa programang People’s Day ubos sa administrasyon ni Mayor Klarex, personal niyang paminawon ang tagsa-tagsang panginahanglanon sa katawhan, kini nagpakita nga tinuod nga timaan sa iyang liderato nga mapaduol ang gobyerno sa katawhan ug ang katawhan mapaduol sa gobyerno. (DYM/CIO/Photos by Jhoanne Abejo and Iren Fuentes)