GITUNOL sa lokal nga kagamhanan pinangulohan ni Mayor Rolando 'Klarex' Uy pinaagi sa Local School Board (LSB) ang 250 ka mga tablets alang sa Alternative Learning System-Night School Program (ALS-NSP) sa nagkadaiyang tunghaan sa dakbayan, adlawng Miyerkules, Sept. 3,sa City Tourism Hall.

 

Benepisyaryo sa maong mga tablets ang Department of Education-Cagayan de Oro uban sa mosunod nga mga eskwelahan: ALS-NSP Xavier University, ALS-NSP USTP, ALS-NSP Capitol University, ALS-NSP PHINMA COC, ug Carmen Science High School, diin matag tunghaan nakadawat ug 50 ka tablets.

 

Ang kalihukan gi-organisar sa Local School Board nga gipangulohan ni Dr. Alicia Anghay, uban sa tumong nga makatabang kini og dako sa mga estudyante pinaagi sa pagamit sa maong teknolohiya.

 

Milangkob sa seremonya ang mga representante gikan sa DepEd-Division of Cagayan de Oro ug sa ALS-NSP Team: Angelito Felisilda (PDS/Division ALS Focal Person), Rubeneth V. Salazar (EPS II/ALS-NSP Coordinator), Johnrill Generoso (ALS-NSP Xavier University Teacher), Pinky Maris Fabria (ALS-NSP PHINMA COC Teacher), Luisa Malio (ALS-NSP USTP Teacher), ug Alona Hilot (ALS-NSP Capitol University Teacher) samtang misaksi usab si Richel Petalcurin-Dahay, acting Department Manager sa City Education and Development Office.

 

Alang sa regular nga klase sa Carmen Science High School, mitambong usab si Dan A. Jabien, SGC Coordinator ug Gina L. Lamparas, Academic/Science Coordinator giubanan usab sa SGC Student Government Council.

 

Ang maong mga tablets gitunol aron suportahan ang implementasyon sa digital learning sa ALS-NSP ug sa Carmen Science High School.

 

Kini nagpakita sa tumong ni Mayor Klarex sa aspeto sa edukasyon nga mahimong 'techy' o digitally advance ang mga estudyante, bisan pa man lahi ang sistema sa ALS. Kinahanglan gihapon silang makakat-on sa pamaagi sa pagtuon nga gigamit karon, diin dako na ang kalabotan sa teknolohiya. (MDS/Photos by Kim Zaldivar/CIO)