Thursday, 05 February 2026 05:44

KOORDINASYON TALI CDRRMD, BARANGAY GIPATUMAN ALAYON SA BAGYONG BASYANG

Written by AGP
HUGOT nga koordinasyon karon ang gipatuman tali sa kagamhanang lokal pinaagi sa City Disaster Risk Reduction and Management Department (CDRRMD) ug mga barangay sa Cagayan de Oro alayon sa preparasyon sa Bagyong Basyang nga gikabalak-ang mo-landfall unyang gabii o kadlawon sa Pebrero 5, 2026.
 
Naka-deploy na ang mga personahe sa CDRRMD USAR team (Urban Search and Rescue) sa pagmonitor sa mga kasubaan ug kabaybayonan, ingon man ang pagpahimangno sa tanang BDRRMC sa mga nagkadaiyang pagpangandam, pagpahigayon og rekorida ug uban pang pamaagi sa komunikasyon sa pag-alerto sa katawhan, ingon man ang pag-andam sa mga evacuation center ugaling gikinahanglan ang paghikling sa mga tawo.
 
Gihingusgan sa CDRRMD ang kamahinungdanon sa pagtuman sa evacuation protocol alang sa kaluwasan sa publiko, kabtangan ug sa mga responders/rescuers. (AGP/Photos by Kim Zaldivar/Reynan Baylin/CIO)