GIDOMINAR sa micro, small and medium enterprises kon MSMEs ang business sector sa dakbayan sa Cagayan de Oro human 99 porsiyento sa rehistradong mga negosyo nahisakop sa MSME category, samtang usa lang ka porsiyento ang mga dagkong kompanya kon large-scale companies category.

 

Kini ang nasuta ni Oxanna S. Custodio, Business Permits and Licensing Division (BPLD) acting head, atol sa tigom, Marso 10 sa Events Management Team for Business Registration 2026 nga gidumala ni EMT presiding officer John Asuncion.

 

Sa 22,207 ka rehistradong business registrants gikan Enero 5 hangtud Marso 3 ning tuig, gitaho ni Custodio nga mokabat sa 87% kon 19,300 ang naglangkob sa micro category, samtang 8% kon 1,745 ang small category, 4% kon 920 ang medium category, ug 1% kon 242 ang large category.

 

Pinasikad sa Republic Act 9501 kon Magna Carta for MSMEs, ang pag-ila sa MSME gi-classify basi sa gidaghanon sa ilang mga empleyado ug gidak-on sa ilang assets, sama sa mosunod:

Micro: 9 employees, P3 million assets

Small: 10–99 employees, P3 million–P15 million assets

Medium: 100–199 employees, P15 million–P100 million assets

Nag-una gihapon ang barangay Carmen nga adunay pinakadaghang rehistradong negosyo dinhi sa syudad (2,667), ug kini gisundan dayon sa barangay Kauswagan (1,443), barangay Bulua (1,071), barangay Lapasan (882) ug Barangay 24 (760).

 

Sa miaging tuig, miabot sa 32,058 ang kinatibuk-ang ihap sa negosyo nga nagparehistro dinhi sa Cagayan de Oro.

 

Karong tuiga, ang business permit registration and renewal period matapos karong umaabot Marso 31 human gilugwayan ni Mayor Klarex Uy ang January 20 deadline nunot sa hangyo sa mga negosyante sa syudad. (CIO)