Giaghat ni Oxanna S. Custodio, hepe sa Business Permits and Licensing Division (BPLD) ang mga negosyante sa dakbayan sa Cagayan de Oro nga pahimuslan ang extended deadline sa business permit renewal nga matapos ugma, Martes, Marso 31.

 

Si Custodio nagkanayon nga abri ang Business One-Stop Shop kon BOSS sa City Tourism Hall karong Lunes, Marso 30 ug Martes, Marso 31 gikan alas-8:00 sa buntag hangtud ala-5:00 sa hapon aron pagdawat sa mga aplikasyon.

 

Inig lapas sa deadline, nagpahimangno si Custodio nga mopahamtang na og multa ang kagamhanan ning syudad sa mga negosyante nga mapakyas pag-renew sa ilang business permit sa gitakdang panahon.

 

Nasayran nga gitakda niadtong Enero 20 ang orihinal nga deadline sa business permit renewal, apan gilugwayan kini ni Mayor Klarex Uy ngadto Marso 31 human mihangyo ang grupo sa mga negosyante sa dakbayan tungod sa mga hagit nga ilang giatubang. (CIO)